मुंबई : ग्रँट रोडवरील पार्वती मॅन्शन इमारती 54 वर्षीय व्यक्तीने शुक्रवारी आपल्या शेजाऱ्यांवर चाकूने हल्ला केल्याची खळबळजनक घटना घडली आहे. यामध्ये दोघांचा मृत्यू झाला असून तीन जण जखमी झाले आहेत. जखमींपैकी दोघांची प्रकृती गंभीर आहे. दुपारी साडेतीन वाजता ही घटना घडली. पोलिसांनी चेतन गाला नावाच्या आरोपीला अटक केली आहे.
शुक्रवारी दुपारी तो रागावलेला असताना तो घरी गेला. तिथून चाकू घेतला आणि नंतर गॅलरीतच शेजाऱ्यांवर एक एक करून भोसकण्यास सुरुवात केली. जनता हा सारा प्रकार बाहेर रस्त्यावर पाहत होती. लोकांनी या घटनेचा व्हिडिओ बनवला आणि काही मिनिटांतच तो व्हायरल झाला.
काही वेळाने पोलीस घटनास्थळी पोहोचल्यावर आरोपीने स्वतःला घरात कोंडून घेतले. खूप प्रयत्नानंतर पोलिसांनी त्याला दरवाजा उघडायला लावला. जखमींपैकी दोघांना एचएन रिलायन्स हॉस्पिटल आणि नायर हॉस्पिटलमध्ये दाखल करण्यात आले आहे. मेकॅनिक दाम्पत्य जयेंद्र आणि नीला यांचा उपचारादरम्यान मृत्यू झाला. डी.बी. मार्ग पोलिसांनी आरोपीविरुद्ध आयपीसी कलम ३०७ आणि इतर अनेक कलमांखाली गुन्हा दाखल केला आहे.
काही शेजाऱ्यांनी मीडिया आणि पोलिसांना सांगितले की, चेतन त्याच्या पत्नीशी नेहमी भांडण करत असे, त्यामुळे त्याचे कुटुंबीय त्याला सोडून गेले होते. मात्र, शेजाऱ्यांनी त्याच्या कुटुंबीयांना आपल्या विरोधात भडकवल्याचा चेतनला संशय आहे. चेतनला एक मुलगा आणि तीन मुली आहेत. यातील एका मुलीचे लग्न झाले आहे. चेतनचे एक दुकान आहे जे त्याने भाड्याने दिले आहे. त्यातून त्याला चांगली रक्कम मिळायची. पण, तो कोणतेही काम करत नसल्याने घरच्यांनी त्याला टोमणे मारल्याचे समोर आले. पत्नीसोबतच्या भांडणाचे हेही एक कारण असल्याचे सांगितले जात आहे.
घटना घडलेल्या इमारतीत तो सुमारे 15 वर्षांपासून राहत होता. त्याला पकडण्यासाठी पोलिसांचे पथक आल्यावर त्याने स्वत:ला कोंडून घेतले आणि भीतीने घराच्या एका कोपऱ्यात शांतपणे बसून राहिला. शेजाऱ्याने सांगितले की, जो कोणी त्याच्यासमोर आला तो त्याच्यावर चाकू चालवत होता. या शेजाऱ्याच्या म्हणण्यानुसार, त्याने स्वत: डोळ्यासमोर चार जण जखमी होताना पाहिले. जे जखमी झाले, त्यांच्या पोटावर, गळ्यावर, हातावर – सर्वत्र चाकूने वार करण्यात आले. पुढे यातील दोघांचा मृत्यू झाला.
