Gujarat Boat Accident : गुजरातमधील वडोदरा येथील हर्णी तलावात बोट उलटल्याने 14 मुले आणि दोन शिक्षकांचा गुरुवारी मृत्यू झाला. शाळकरी मुले सहलीसाठी तलावावर गेल्याचे सांगण्यात येत आहे. अशा परिस्थितीत या मृत्यूंना जबाबदार कोण आणि कोणाच्या निष्काळजीपणामुळे एवढी मोठी दुर्घटना घडली, असा प्रश्न उपस्थित होत आहे.
मिळालेल्या माहितीनुसार, बोटीवर एकूण 26 जण होते. यात शाळकरी मुले आणि शिक्षकांचा समावेश होता. सर्वजण न्यू सनराईज स्कूलचे होते. या बोटीत 16 मुलांना बसण्याची क्षमता होती, मात्र 26 मुले बसली होती, यावरून तुम्ही निष्काळजीपणाचा अंदाज लावू शकता. ही मुले हर्णी तलावावर सहलीसाठी आली होती.
कोणीही लाईफ जॅकेट घातलेले नव्हते, असे सांगण्यात येते. जर कोणी लाईफ जॅकेट घातले असते तर एवढी मोठी दुर्घटना घडली नसती.स्थानिक आमदार केयूर रोकडिया म्हणाले की, या प्रकरणात जबाबदार असलेल्यांवर कठोर कारवाई केली जाईल, परंतु यावेळी प्रथम प्राधान्य लहान मुलांचे प्राण वाचवणे आहे.
पंतप्रधान नरेंद्र मोदी यांनी या दुर्घटनेवर शोक व्यक्त केला असून जखमींच्या लवकरात लवकर बरे होण्यासाठी शुभेच्छा दिल्या आहेत. मृतांच्या कुटुंबीयांना 2 लाख रुपये आणि जखमींना 50 हजार रुपये मदत देण्यात येणार असल्याचे त्यांनी सांगितले. पंतप्रधान म्हणाले की, स्थानिक प्रशासन बाधित लोकांना शक्य ती सर्व मदत करत आहे.
या दुर्घटनेवर प्रतिक्रिया व्यक्त करताना मुख्यमंत्री भूपेंद्र पटेल म्हणाले की, हर्णी तलावात बुडून मुलांचा मृत्यू झाल्याची घटना अत्यंत वेदनादायी आहे. मदत आणि बचाव कार्य सुरू आहे. अपघातग्रस्तांना तातडीने उपचार देण्याच्या सूचना देण्यात आल्या आहेत. सीएम पटेल यांनी या अपघाताच्या उच्चस्तरीय चौकशीचे आदेश दिले आहेत. वडोदरा जिल्हा दंडाधिकारी सविस्तर तपास करतील आणि 10 दिवसांत राज्य सरकारला अहवाल सादर करतील.
वडोदराच्या खासदार रंजनबेन धनंजय भट्ट यांनी सांगितले की, जबाबदार व्यक्तींवर कठोर कारवाई केली जाईल. अपघाताचे कारण म्हणजे बोटीत क्षमतेपेक्षा जास्त मुले बसली होती.
#WATCH गुजरात: वडोदरा की हरनी मोटनाथ झील में बच्चों को ले जा रही एक नाव पलट गई। बचाव कार्य जारी है। pic.twitter.com/wTqO898MHZ
— ANI_HindiNews (@AHindinews) January 18, 2024
