एकाच कुटुंबातील पाच जण ओढ्यात बुडाल्याने पाचही जणांचा मृत्यू…

न्यूज डेस्क – एकाच कुटुंबातील 5 जण ओढ्यात बुडाल्याने पाचही जणांचा मृत्यू झाल्याची हृदयद्रावक घटना मुळशी तालुक्यातील कोळवण जवळील वाळेन येथे काल रविवारी घडली. या घटनेत बुडालेल्या पाचही जणांचा मृत्यू झाल्याची माहिती पौड पोलिसांनी दिली आहे. सर्व मृतदेह ओढ्यातून बाहेर काढण्यात मुळशी आपत्ती व्यवस्थापनाच्या पथकाला यश आले असल्याची माहितीही पोलीस नाईक रविंद्र नागटिळक यांनी दिली आहे.

मृत्यू झालेल्यांची नावे शंकर दशरथ लायगुडे (38), पौर्णिमा शंकर लायगुडे (36), आर्पिता शंकर लायगुडे (20), अंकिता शंकर लायगुडे (13) आणि राजश्री शंकर लायगुडे (12), सर्वजण रा. वाळेन, ता. मुळशी, जि. पुणे) अशी मृत्यू झालेल्यांची नावे आहेत.

पोर्णिमा लायगुडे या रविवारी सकाळी साडेदहा वाजण्याच्या सुमारास गावातील ओढ्यावर कपडे धुण्यासाठी गेल्या होत्या. त्यांचा पाय घसरला आणि त्या ओढयात बुडाल्या. त्यांना वाचविण्यासाठी त्यांच्या तिन्ही मुलींनी तत्काळ ओढ्याकडे धाव घेतली आणि त्यांना वाचविण्यासाठी प्रयत्न केले. मात्र, त्या तिन्ही मुली देखील एकमेकांना वाचविण्याच्या प्रयत्नात ओढ्यात बुडाल्या.

हा प्रकार शंकर दशरथ लायगुडे यांना समजल्यानंतर त्यांनी देखील ओढयाकडे धाव घेतली आणि कुटुंबाला वाचविण्याचा प्रयत्न केला. मात्र, ते देखील ओढ्यात बुडाले. या दुर्दैवी घटनेची माहिती वाऱ्यासारखी पसरताच पौड पोलिसांनी घटनास्थळी धाव घेतली.

दरम्यान, मुळशी आपत्ती व्यवस्थापन पथकास याबाबतची माहिती कळविण्यात आली. त्यांनी ओढ्यात बुडालेले सर्व मृतदेह पाण्याबाहेर काढले. पुढीलउ त्तरीय तपासणीसाठी हे मृतदेह पौड येथील ग्रामीण रूग्णालयात आणण्यात आलेले असून घटनास्थळी पोलीस निरीक्षक अशोक धुमाळ यांच्यासह आपत्ती व्यवस्थापनचे प्रमोद बलकवडे यांनी सतर्कतेने मृतदेह पाण्याबाहेर काढण्यासाठी सचोटीने प्रयत्न केले.

घडलेल्या या दुर्घटनेमुळे संपूर्ण मुळशी परिसरात शोककळा पसरली आहे. घटना नेमकी कशी घडली याबाबत माहिती घेण्याचे काम सुरू असल्याचे पोलिसांकडून सांगण्यात आले आहे.

LEAVE A REPLY

Please enter your comment!
Please enter your name here